Informacion pa STUDIANTENAN

Published on 23/07/2018

Informacion pa studiantenan di Aruba cu ta bay biba afor

Prome cu bo por bay studia afor, mester regla diferente asunto. Un di e asuntonan aki ta cu bo mester regla pa kita bo nomber (schrijf uit) for di e Registro di Populacion (bevolkingsregister). Esaki ta conta pa TUR studiante cu ta bay biba for.

Segun e ley di e Registro di Populacion, e populacion ta existi di solamente personanan cu di berdad ta biba na Aruba. Tur otro hende cu NO ta biba akinan pa un of otro motibo (entre otro pa estudio), MESTER kita nan nomber (schrijf uit). Acaso si un hende no haci esaki e lo por wordo kita automaticamente.
Studiantenan cu ta bay Hulanda

Si bo kier bay studia na Hulanda, bo mester inscribi bo mes na e municipio (gemeente) cu bo ta bay biba na Hulanda. Akibao nos lo duna algun tips pa hasi e inscripcion na Hulanda mas facil.

Kitamento di bo nomber for di e Registro di Populacion (bevolkingsregister).

Prome cu bo biaha pa Hulanda, bo mester kita bo nomber (schrijf uit) for di e registro di populacion (bevolkingsregister). Esaki ta un condicion necesario pa bo por inscribi bo mes na Hulanda.  Un di e documentonan cu bo tin cu entrega ora bo ta bay inscribi bo mes na Hulanda ta e prueba di kitamento di bo nomber (uitschrijvingsbewijs) cu bo ta ricibi na momento cu bo kita bo nomber for di e bevolkingsregister. Ora di schrijf uit, ta importante pa bo indica na Censo ta na cua municipio bo ta bay biba na Hulanda. Esaki por diferencia di e municipio na unda bo ta bay studia. Ora di establese bo mes na Hulanda, bo lo inscribi bo mes na e municipio cu bo a indica na Censo cu bo ta bay BIBA. Si bo no haci esaki, bo lo por haya problema ora di inscribi na Hulanda.

Si bo dicidi pa inscribi bo mes na un otro municipio cu esun cu bo a indica na Censo, esaki por trece cun’e cu e inscripcion na Hulanda por tarda, cu consecuencia cu lo bo por haya bo number di servicio civil (na hulandes: burgerservicenummer (BSN)) mas laat.

Inscripcion den Gemeentelijke Basisadministratie (GBA)

Ta recomendabel pa bo busca informacion adelanta, por ehempel riba e website di e municipio, tocante con e inscripcion den GBA ta regla na e municipio. Por ehempel si, mester traha un afspraak of cual ta e documentonan cu bo mester entrega na e momento cu bo ta bay inscribi bo mes. Tin municipionan caminda tin dianan fijo of citanan apart pa locual ta inscripción den GBA di studiantenan cu ta bini for di Caribe.

Na momento cu bo ta bay inscribi bo mes den GBA na un municipio bo mester entrega e siguiente documentonan:

• Paspoort (pa nan por establece bo identidad);
• Comprobante di mudansa (uitschrijvingsbewijs) ricibi for di Censo ora bo a schrijf uit)
• Comprobante di e direccion na Hulanda (por ehempel un copia di e contrato di huur of un carta firma y un copia di e cedula di e miembro di famia cu ta declara cu por lo pronto bo por biba serka dje).
• Acta di nacimento (afschrift van geboorteakte)

Tuma nota: si bo no a nase na Aruba, ta bon pa bo aplica pa un acta di nacimento na tempo for di e pais cu bo a nace y si no ta parti di Reino mester laga traduci esaki (si ta necesario) y laga legalisa esaki (si ta necesario) o laga pone un apostille riba esaki. Pa mas informacion riba e tema aki mester wak riba e website di cada municipio.

Punto di contacto na Aruba

Si tin pregunta tocante e informacion aki riba y/of bo a haya un problema cu bo inscripcion na Hulanda entre otro pa falta di documento por mail nos. Por hanja e emails bao ‘contacts’ riba nos website www.censo.aw.